Diwali 2017 Kuch Achha Laayi Hai

Jab saal 2016 ka end kharab hone laga to muje samajh aa chuka tha ki 2017 ke bhi lagne wale hain. Nahi nahi koi negativity wali baat nahi haai, instinct hai jispe yakeen karne ki salaah humein sab dete hain! To bina mann chota kiye mene 2017 planout kar liya tha. Waqt tha ab mere pas jise mene socha tha ki hobby classes or self development me utilize kiya jaega. Kuch hadd tak hua bhi, par jab samay sath nahi deta to kaam bhi nahi ban paate.

Bigadte kaam, ek ke baad ek hone wale nuksaan, mom dad ki nasaaz tabiyat or tuchhi cheezo me swaaha hoti savings ne dimag ka balance kharab karna shuru kar diya tha. Par humesha ki tarah bas ek hi baat rehti mann me ‘be patient, bura waqt hai nikal jaega!’ Ese karte karte 10 mahine nikal gaye.. Diwali aa gayi.. pata nhi 2017 ko kis baat ki jaldi thi. 

Dekho, Diwali pe sirf bachho ke maze hote hain humare liye to kaam badh jata hai. Safai, shopping, long weekend ke pehle kaam niptane ka pressure, online sale pe wishlist banane ka tension, gift, mithayi, rangoli ki design, ghar-office ka decoration or kis din kya pehne uska bhi tension. Back to back festivals niptane k bad ghar ki safai kyuki bhaiya diwali aane wali hai.. laxmiji aaengi.  2016 me bewakoof banaya tha laxmiji ne is saal nahi banane denge. Kona kona saaf kar denge. 2018 me Bill Gates banna h humko! But jesa ki mene kaha.. samay sath hi nahi de raha hai.. usko race jeetni h! To apan nhi kar paaye achhe se safai. But iska matlab ye nahi ki mere pas paise nahi aaenge.. my mother’s logic came to rescue!

Bachpan me mummy ya Nani ne bataya tha ki Dhanteras ya Diwali ke din chipkali (lizard) ko dekhne se, aane wale samay me dhan laabh hota hai. Wese to meri bahot behes hoti hai in sab baato ko leke. Pehle valid reason batao warna mujpe ye sab mat thopo. Wo kya hai ki mene mummy or Nani se 4 kitaabein zyada padhi hai.. wo bhi angrezi wali to hum khud ko family ka “The Face of Change” samjhte hain. 

Khair, wo chipkali wali baat aaj bhi dimag me ghar kar ke baithi hui thi. Sham ko jab ghoom firke ghar pohnche to dekha ghar ke main door ke baaju me chipkali. Mere anadar ka laalchi insaan jaag gaya. Abhi tak jo mene hit spray kar karke cockroach, chipkali or cheetiyaan maari thi ab me is chipkali ko bade hi prem se nihaar rahi thi. Paise laegi na aane wale samay me. Ab kehne wale kahenge ki ye to dakiyanoosi baatein hain, par ye humare shastron me bhi likha hai.  Or doobte ko tinke ka sahara mila hai!  Saaf bta du ki mene The Secret padhi bhi hai or dekhi bhi hai !

Aapko kya lagta hai? Kya aap bhi kono me ghus ghus k chipkali dhundhoge? Shayad a chipkaali may change your life!

2017 hum me se bahot sare logo ke liye achha nahi raha lekin muje bharosa hai ki 2018 achha hoga. Ye Diwali laayi hai ek nayi ummeed!

Diwali ke ye 3 din, mann se bair or gumm nikalein or ek nayi shuruwat ki taraf badhein. Patakhe kam se kam jalayein or khushiyaa baatein! Happy Diwali :)

5 saal baad

Namaste,

Humara naam Varsha hai. Or log pyaar se humein Bhatu bulate hain. Aaj kareeb 5 saal baad humne dubara kuch likhna chaha to socha ki kyu na shuruwat apne bare me hi bata k ki jaaye. 

Ab hum 25 saal ke ho gaye hain. Jeevan ki silver jubilee 2 mahine pehle ho chuki hai jiski party dost abhi tak maang rahe hain! Or life me cheeze jo hain wo workout nahi ho pa rahi hain. MBA hai jo khatam nahi ho pa raha. Salary hai jo badh nahi pa rahi, dost hain jinki stupid harkate humse sehen nahi ho pa rahi. Family hai jo ki byaao karane ke peeche padi hai or khwab jo hain wo din-b-din tamannaaon me tabdeel hone lage hain. 

Agar qualification ki baat karein to UG se leke PG tak humne sirf mass communication or media dekha suna padha khaya piya hai. Is baat pe humare teachers kabhi agree nahi karenge kyuki hum college sirf muh dikhane jate the. Iska karan humne humare purane article me bataya hai.  Graduation ke 2nd semester se hi ghus gaye the hum naha dhoke field me. Kabhi radio me internship to kabhi event management. Fir kabhi short film or blogging to kabhi public relation.

Par ab jo hai mamla zara sangeen ho gaya hai. Esa scene ban gaya hai mano ki hum kisi registan me apne saathiyon se bichadh gye hain. Humare pas compass nhi hai direction dekhne ke liye or aasman me pole star b badalon me chup gaya hai! Ab jeevan me na nasha hi raha h or na hi beer ka swaad bhaata hai.

Esa nahi hai ki hum is sab se nikalna nahi chahte. Hum hath paer maar rahe hain ye soch ke ki shayad koi daao lag jaye nishane pe. Tootti himmat or khatam hote patience ko bachane ke liye humne insta se leke pinterest tak har jagah motivational quotes padh liye hain. Jaha thodi motivation milti hai or koi kaam karne jate hain to chaar logo ka muh fool jata hai fir sala panauti shuru ho jati hai. Or helplessness to itni ho gayi hai ki ab rona nahi hasi aati hai ki 25 saal ki umra me aake humari zindagi ka meme ban gaya hai!

Shayad hum sabhi k jeevan me esa phase aata hai jab hum samajh nahi pate ki zindagi ko kis taraf le jana chahiye. Hum sare permutation combination laga dete hain solution nikaalne me. Bas humara jeevan bhi isi padaav pe hai. Hum na to depressed hain or na hi frustrate bas thode clueless hain. Har roz ganpati bappa se yahi prarthana karte hain ki bas koi raasta dikhado, uspe chal to hum khud hi lenge. Par wo bhi abhi humari maze lene me laga hai.

Wese shayad humne abhi tak btaya nahi ki humari ek badi behen or ek choti behen bhi hai. Jo badi behen hai uska ek hi sapna hai ki hum shadi karle or jo choti behen hai usko jeevan me mehez do hi dikkatein hain. Ek ki uske pas achhe kapde nahi hote to wo aaye din humse koi na koi dress mangne aa jati hai or dusra ki usko AC wale room me sona hota hai. Bataiye ab inka kya karein. Yahan jeevan k law lag gaye hain or inko shadi or AC room ki padi hai. 

Baharhaal, humare ek mitra hain Madhur Kakwani, jo isse nikalne ke liye humein aaye din naye naye sujhaw dete hain. Kabhi kehte hain ki tu Mumbai chale ja to kabhi kehte hain ki khud ka startup daal le. Or ek dusre mitra hain Rishi Mishra jisne humein ye sikhaya h ki hum sabhi k jeevan ka indradhanush bheeshan varsha ke baad hi nikalta hai. Hum bhi besabri se intezaar kar rahe hain ki kab ye Hurricane Harvey humare jeevan se jaega.

Hum ummeed karte hain ki 2018 ki February humare jeevan me bhi basant laaegi!! 

Jald hi milenge jeevan k kisi naye kaand ke saath. Tab tak ke liye shubhratri!